წარმოშობის სერტიფიკატი ჩინეთიდან არის ის დოკუმენტი, რომელიც იმპორტის გადასახადს 12%-იდან ან 5%-იდან 0%-მდე წევს. მის გარეშე ჩინური ტვირთი სრული განაკვეთით ფორმდება: 12%-იან პოზიციაზე, 50 000 ₾-იან ტვირთზე, ეს 6 000 ₾-ია. მთავარი კი დროა — სერტიფიკატს მოგვიანებითაც გასცემენ, მაგრამ საბაჟოზე ორიგინალი უნდა წარადგინო: ის ჩინეთიდან ფოსტით მოდის, ტვირთი კი ამ დროს დგას და მოცდენის ხარჯი გერიცხება.
📞 +995 598 154833 | 📲 WhatsApp | ✈️ Telegram
⚡ მოკლედ, ყველაზე მთავარი
- საქართველოსა და ჩინეთს შორის თავისუფალი ვაჭრობის შეთანხმება მოქმედებს 2018 წლის 1 იანვრიდან.
- საქართველოში იმპორტის გადასახადი სამ დონეზეა: 0%, 5% ან 12%. საქონლის უმეტესობა ისედაც 0%-ია — ამიტომ ჯერ HS კოდი უნდა შემოწმდეს.
- თუ პოზიცია 5%- ან 12%-იანია, სწორი წარმოშობის სერტიფიკატი ამ გადასახადს ანულებს.
- დღგ (18%) არ ნულდება — სერტიფიკატი მხოლოდ იმპორტის გადასახადს ეხება.
- საჭიროა სპეციალური CGFTA ფორმა, და არა ჩვეულებრივი „Certificate of Origin”.
- სერტიფიკატი მოქმედებს გაცემიდან 1 წელი და ონლაინ უნდა გადამოწმდეს.
ამ სტატიაში
- რატომ ღირს ეს დოკუმენტი ათასობით ლარი
- რა არის წარმოშობის სერტიფიკატი ჩინეთიდან
- ოთხი პირობა, რომ 0% ამოქმედდეს
- სერტიფიკატის 14 ველი — ინსტრუქცია
- ველი 10 — წარმოშობის კრიტერიუმები
- ნიმუში და ჩამოსატვირთი ფორმა (PDF)
- როგორ გადაამოწმო ონლაინ
- 9 შეცდომა, რომელიც სერტიფიკატს ფუჭად აქცევს
- ორი რეალური შემთხვევა
- როდის უნდა დაიწყო — ტაიმლაინი
- როდის არ გჭირდება წარმოშობის სერტიფიკატი
- ხშირად დასმული კითხვები
რატომ ღირს ეს დოკუმენტი ათასობით ლარი
იმპორტის გადასახადი წმინდა დანაკარგია — ის ხარჯში ჯდება და უკან აღარ ბრუნდება. დღგ სხვა საქმეა: დღგ-ს გადამხდელი კომპანია მას ჩათვლით იბრუნებს. ამიტომ, როცა სერტიფიკატი არ გაქვს, რეალურად კარგავ ზუსტად იმ 12%-ს (ან 5%-ს), რაც იმპორტის გადასახადში გადაიხადე — და ეს თანხა პირდაპირ ტვირთის თვითღირებულებას ემატება.
რამდენს კარგავ სერტიფიკატის გარეშე
| საბაჟო ღირებულება | 5%-იანი პოზიცია | 12%-იანი პოზიცია |
|---|---|---|
| 20 000 ₾ | 1 000 ₾ | 2 400 ₾ |
| 50 000 ₾ | 2 500 ₾ | 6 000 ₾ |
| 100 000 ₾ | 5 000 ₾ | 12 000 ₾ |
| 180 000 ₾ | 9 000 ₾ | 21 600 ₾ |
ეს არის თანხა, რომელიც ბიუჯეტში რჩება და უკან აღარ ბრუნდება. დღგ ამ ცხრილში განზრახ არ არის — ის ჩათვლით ბრუნდება და დანაკარგს არ წარმოადგენს, თუ თქვენს კომპანიას აქვს დღგ-ს გადამხდელისა და კვალიფიციური კომპანიის სტატუსი. ამ სტატუსების გარეშე დღგ-ც ხარჯად გექცევათ — მათ აღებაში ჩვენი ბუღალტრები დაგეხმარებიან.
💡 შენი ტვირთის ზუსტი ციფრი რომ ნახო, გამოიყენე განბაჟების კალკულატორი — იქ ორივე ვარიანტს (0% და 12%) გვერდიგვერდ შეადარებ. გადასახადების სრული ლოგიკა აღწერილია გვერდზე განბაჟება და იმპორტის გადასახადები.
რა არის წარმოშობის სერტიფიკატი ჩინეთიდან
წარმოშობის სერტიფიკატი არის ოფიციალური დოკუმენტი, რომლითაც ჩინეთის უფლებამოსილი ორგანო ადასტურებს: ეს კონკრეტული საქონელი ნამდვილად ჩინეთშია წარმოებული. სწორედ ეს დადასტურება რთავს თავისუფალი ვაჭრობის შეთანხმების შეღავათს და იმპორტის გადასახადს ანულებს.
ყურადღება — ეს ყველაზე ხშირი შეცდომაა: არსებობს „ჩვეულებრივი” წარმოშობის სერტიფიკატი (ordinary CO), რომელსაც ჩინეთში ნებისმიერ ექსპორტს უწერენ. ის შეღავათს არ იძლევა. საჭიროა შეთანხმების საკუთარი ფორმა — დანართი II-B, რომლის სათაურშიც პირდაპირ წერია:
CERTIFICATE OF ORIGIN
Form for China-Georgia Free Trade Agreement
თუ სერტიფიკატის თავში ეს ხაზი არ წერია — დანარჩენი აღარ არის მნიშვნელოვანი, შეღავათი არ ამოქმედდება.
ვინ გასცემს ჩინეთში
- ჩინეთის საბაჟო (GACC — General Administration of Customs of China)
- CCPIT — ჩინეთის საერთაშორისო ვაჭრობის ხელშეწყობის საბჭო და მისი ადგილობრივი განყოფილებები
სერტიფიკატს იღებს ექსპორტიორი ან მწარმოებელი ჩინეთში — შენ, როგორც იმპორტიორი, მას პირდაპირ ვერ აიღებ. ამიტომაც არის კრიტიკული, რომ მოთხოვნა შეკვეთის ეტაპზევე დააფიქსირო.
ოთხი პირობა, რომ 0% ამოქმედდეს
გადასახადი ნულდება მხოლოდ მაშინ, თუ ოთხივე პირობა ერთდროულად სრულდება. ერთიც რომ დაირღვეს — რჩება ბაზის განაკვეთი.
| # | პირობა | რას ნიშნავს პრაქტიკაში |
|---|---|---|
| 1 | წარმოშობის ქვეყანა — ჩინეთი | საქონელი ჩინეთში უნდა იყოს წარმოებული ან საკმარისად გადამუშავებული. „ჩინეთიდან გამოგზავნილი” და „ჩინეთში წარმოებული” სხვადასხვა რამაა. |
| 2 | HS კოდი შეღავათს ექვემდებარება | შეთანხმებით საქართველო ჩინური პროდუქციის 96,5%-ზე ანულებს ტარიფს — მაგრამ არა ყველაფერზე. არსებობს გამონაკლისების სია (ძირითადად სასოფლო-სამეურნეო პოზიციები), სადაც სერტიფიკატი გადასახადს ვერ ანულებს. |
| 3 | სერტიფიკატი სწორი, ვადაში და ტვირთის დამფარავია | ყველა ველი შევსებულია, მონაცემები ინვოისს ემთხვევა, ხელმოწერა და ბეჭედი აქვს, არ არის ვადაგასული და რაოდენობრივად ფარავს დეკლარირებულ საქონელს. |
| 4 | ტვირთი უშუალოდ ჩინეთიდან მოდის | შეღავათი მხოლოდ ჩინეთიდან პირდაპირ გამოგზავნილ ტვირთზე მოქმედებს. თუ საქონელი ჩინეთშია წარმოებული, მაგრამ ტვირთი, ვთქვათ, რუსეთის საწყობიდან მოდის — სერტიფიკატი აღარ მუშაობს და გადასახადი არ განულდება, რაც არ უნდა სწორად იყოს ის შევსებული. მესამე ქვეყანაზე გავლა დასაშვებია მხოლოდ ტრანზიტის სახით, საბაჟო კონტროლის ქვეშ და შესაბამისი სატრანსპორტო დოკუმენტით. |
⚠️ მე-2 პირობა ყველაზე ხშირად რჩება შეუმოწმებელი. სწორი თანმიმდევრობა ასეთია: ჯერ დგინდება HS კოდი, შემდეგ — ამ კოდზე მოქმედი განაკვეთი. თუ განაკვეთი ისედაც 0%-ია, წარმოშობის სერტიფიკატი შედეგს ვერ შეცვლის და მისი მოთხოვნა ექსპორტიორისგან საჭირო აღარ არის. თუ განაკვეთი 5% ან 12%-ია — სერტიფიკატზე მუშაობა შეკვეთის ეტაპზევე უნდა დაიწყოს.
სერტიფიკატის 14 ველი — რა უნდა ეწეროს თითოეულში
ფორმას 14 ველი აქვს. ქვემოთ ოფიციალური ინსტრუქციაა, გვერდით კი — ის შეცდომები, რომლებსაც რეალურ ტვირთებზე ვხვდებით. დაბეჭდე ეს ცხრილი და ექსპორტიორს გაუგზავნე — ასე ყველაზე სწრაფად გვარდება.
| ველი | რა უნდა ეწეროს | ხშირი შეცდომა |
|---|---|---|
| 1. ექსპორტიორი | სრული იურიდიული სახელი, მისამართი და ქვეყანა | იწერება სავაჭრო ბრენდი ან აგენტის სახელი, ინვოისში კი სხვა კომპანიაა |
| 2. მწარმოებელი | სრული სახელი და მისამართი. თუ ექსპორტიორი და მწარმოებელი ერთი და იგივეა — „SAME”. კონფიდენციალურობის შემთხვევაში — „Available to the competent authority or authorised body upon request” | ველი ცარიელი რჩება (დასაშვები ჩანაწერის ნაცვლად) |
| 3. იმპორტიორი | შენი კომპანიის ზუსტი სახელი და მისამართი საქართველოში | სახელი შემოკლებულია ან განსხვავდება ინვოისისგან |
| 4. ტრანსპორტი და მარშრუტი | გამგზავრების თარიღი, გემის/ფრენის/მატარებლის/ავტოს ნომერი, გამგზავრებისა და დანიშნულების პორტი | დანიშნულების პორტში სხვა ქვეყანა წერია, ტვირთი კი საქართველოში მოდის |
| 5. შენიშვნები | შეკვეთის ნომერი, აკრედიტივის ნომერი. თუ ინვოისი მესამე ქვეყნის კომპანიამ გასცა (მაგ. ჰონგ-კონგის ან სინგაპურის ტრეიდერმა) — აქ სავალდებულოდ უნდა ეწეროს მისი სახელი, მისამართი და ქვეყანა | ტრეიდერის ინვოისია, ველი 5 კი ცარიელია — შეღავათი ეჭვქვეშ დგება |
| 6. ნივთის ნომერი | პოზიციის რიგითი ნომერი | — |
| 7. ნიშნები შეფუთვაზე | მარკირება და ნომრები. თუ გამოსახულებაა — „IMAGE OR SYMBOL (I/S)”, თუ არაფერია — „NO MARKS AND NUMBERS (N/M)” | ველი ცარიელი რჩება |
| 8. შეფუთვა და აღწერა | ადგილების რაოდენობა და სახეობა + საქონლის სრული აღწერა. ნაყარი ტვირთი — „in bulk”. აღწერის ბოლოს დაისმება „***” ან „\” | აღწერა ზედმეტად ზოგადია („goods”, „spare parts”) და საბაჟო ვერ აკავშირებს ინვოისსა და HS კოდს |
| 9. HS კოდი | ექვსნიშნა კოდი თითოეულ პოზიციაზე | კოდი არ ემთხვევა იმას, რითაც დეკლარაცია იწერება |
| 10. წარმოშობის კრიტერიუმი | WO / WP / PSR ან პროცენტი (მაგ. „40%”) — იხ. ცხრილი ქვემოთ | ველი ცარიელია ან შემთხვევითი ასოა ჩაწერილი |
| 11. წონა | ბრუტო ან ნეტო წონა კილოგრამებში (ან სხვა ზუსტი ერთეული) თითოეულ პოზიციაზე | ⚠️ ერთ-ერთი ყველაზე ხშირი გამოტოვება — ველი ცარიელია და სერტიფიკატი ტვირთს „ვერ ერგება” |
| 12. ინვოისის ნომერი და თარიღი | კომერციული ინვოისის ნომერი და თარიღი | ⚠️ მეორე ყველაზე ხშირი გამოტოვება. ან წერია პროფორმის ნომერი, რეალური ინვოისი კი სხვაა |
| 13. ექსპორტიორის დეკლარაცია | წარმოების ქვეყანა, იმპორტიორი ქვეყანა, ადგილი, თარიღი და უფლებამოსილი პირის ხელმოწერა | იმპორტიორ ქვეყნად საქართველო არ წერია |
| 14. სერტიფიცირება | უფლებამოსილი ორგანოს ადგილი, თარიღი, ხელმოწერა და ბეჭედი | ბეჭედი გაუმჭვირვალეა/ჩამოჭრილია სკანზე, ან თარიღი ველი 13-ზე ადრეა |
ველი 10 — წარმოშობის კრიტერიუმები
მე-10 ველში ერთი კოდი იწერება და ის ხსნის, რატომ ითვლება საქონელი ჩინურად. ოთხი ვარიანტია:
| კოდი | რას ნიშნავს | ტიპური მაგალითი |
|---|---|---|
| WO | საქონელი მთლიანად ჩინეთშია მოპოვებული ან წარმოებული | სასოფლო-სამეურნეო პროდუქცია, წიაღისეული |
| WP | საქონელი მთლიანად ჩინური წარმოშობის მასალებისგანაა დამზადებული | ადგილობრივი ნედლეულით დამზადებული ნაწარმი |
| PSR | გამოყენებულია უცხოური მასალები, მაგრამ დაკმაყოფილებულია კონკრეტული პროდუქტისთვის დადგენილი წესი | ტექნიკა, აწყობილი ნაწარმი — ყველაზე გავრცელებული ვარიანტი |
| 40% (ან სხვა %) | უცხოური მასალებით წარმოებული საქონელი, რომელშიც რეგიონული ღირებულება არანაკლებ 40%-ია | შერეული კომპონენტებით აწყობილი პროდუქცია |
იმპორტიორმა ეს კოდი თავად არ უნდა შეარჩიოს — ეს მწარმოებლის პასუხისმგებლობაა. მაგრამ ცარიელი მე-10 ველი უკვე პრობლემაა: ასეთი სერტიფიკატი არასრულად შევსებულად ითვლება.
ნიმუში — როგორ გამოიყურება წარმოშობის სერტიფიკატი ჩინეთიდან
ასე გამოიყურება ის ფორმა, რომელიც ექსპორტიორმა ჩინეთში უნდა აიღოს. ყურადღება მიაქციე სათაურს — სწორედ ის განასხვავებს ამ დოკუმენტს ჩვეულებრივი წარმოშობის სერტიფიკატისგან.
📄 ჩამოტვირთე ოფიციალური ფორმა და ინსტრუქცია
- წარმოშობის სერტიფიკატის ფორმა + შევსების ინსტრუქცია — ქართულად (PDF)
- Certificate of Origin form + overleaf instructions — English (PDF)
ორივე ერთი და იგივე დოკუმენტია — შეთანხმების დანართი II-B, უბრალოდ ორ ენაზე. ინგლისური ვერსია გაუგზავნე ექსპორტიორს ჩინეთში (იქ ქართულს ვერ წაიკითხავენ), ქართული კი შენთვის დაიტოვე.
ქვემოთ პირობითი მაგალითია — ჩინეთიდან საზღვაო ტვირთი, ერთი პოზიცია. ასე უნდა გამოიყურებოდეს სწორად შევსებული ფორმა.
| ველი | შევსების მაგალითი |
|---|---|
| სერტიფიკატის ნომერი | ნომერი და გაცემის ადგილი (Issued in: China) |
| 1. ექსპორტიორი | NINGBO EXAMPLE IMPORT & EXPORT CO., LTD No. 123 Zhongshan Road, Ningbo, Zhejiang, China |
| 2. მწარმოებელი | SAME |
| 3. იმპორტიორი | LLC EXAMPLE GEORGIA Vazha-Pshavela Ave. 00, Tbilisi, Georgia |
| 4. ტრანსპორტი | Departure date: 12.03.2026 Vessel No.: MSC EXAMPLE V.123 Port of loading: Ningbo Port of discharge: Poti, Georgia |
| 5. შენიშვნები | P/O No. 2026-0451 (თუ ინვოისს მესამე ქვეყნის კომპანია გასცემს — მისი სახელი, მისამართი და ქვეყანა აქ) |
| 6. ნივთის ნომერი | 1 |
| 7. ნიშნები | NO MARKS AND NUMBERS (N/M) |
| 8. შეფუთვა და აღწერა | 320 CARTONS Ceramic floor tiles, glazed, 600×600 mm *** |
| 9. HS კოდი | 690723 |
| 10. კრიტერიუმი | PSR |
| 11. წონა | 18 400 kg (gross) / 17 950 kg (net) |
| 12. ინვოისი | INV-2026-0451, 05.03.2026 |
| 13. ექსპორტიორის დეკლარაცია | produced in: CHINA · exported to: GEORGIA Ningbo, 10.03.2026 + ხელმოწერა |
| 14. სერტიფიცირება | უფლებამოსილი ორგანო, 11.03.2026 + ხელმოწერა და ბეჭედი |
🔍 შენ თვითონ როგორ შეამოწმო 60 წამში: ველი 8-ის აღწერა, ველი 9-ის HS კოდი, ველი 11-ის წონა და ველი 12-ის ინვოისის ნომერი ოთხივე უნდა ემთხვეოდეს კომერციულ ინვოისს. თუ ერთი მათგანი არ ემთხვევა ან ცარიელია — სერტიფიკატი დასაბრუნებელია.
როგორ გადაამოწმო წარმოშობის სერტიფიკატი ონლაინ
წარმოშობის სერტიფიკატის გადამოწმება უფასოა — ჩინეთში გაცემული სერტიფიკატები ოფიციალურ ელექტრონულ ბაზებშია. ეს გაკეთდეს მაშინ, როცა სკანს მიიღებ, და არა მაშინ, როცა ტვირთი საზღვარზე დგას.
- აიღე სერტიფიკატის ნომერი და გაცემის თარიღი. ორივე ფორმის თავშია, ველ „Certificate No.”-ს გვერდით.
- თუ სერტიფიკატი CCPIT-ის გაცემულია (ბეჭედზე წერია CCPIT ან China Council for the Promotion of International Trade) — შეამოწმე მათ პორტალზე: check.ecoccpit.net
- თუ სერტიფიკატი ჩინეთის საბაჟოს გაცემულია — შეამოწმე ჩინეთის საბაჟოს ოფიციალურ პლატფორმაზე: origin.customs.gov.cn (E-government Platform for the Origin of China’s Exports)
- შეადარე პოზიცია-პოზიციაზე. ბაზაში ნაჩვენები აღწერა, HS კოდი, წონა და ინვოისის ნომერი უნდა ემთხვეოდეს იმ ქაღალდს, რომელიც ხელში გიჭირავს — და კომერციულ ინვოისს.
💡 საქართველოში გაცემული წარმოშობის სერტიფიკატები (ექსპორტისთვის) ცალკე მოწმდება — შემოსავლების სამსახურის გვერდზე.
⚠️ თუ ნომერი ბაზაში საერთოდ არ იძებნება — ეს უკვე სერიოზული სიგნალია. ასეთი დოკუმენტით დეკლარაციის წარდგენა რისკია: შეღავათი არ ამოქმედდება, ჯარიმის საკითხიც დგება.
9 შეცდომა, რომელიც სერტიფიკატს ფუჭად აქცევს
- ჩვეულებრივი CO ფორმაა, და არა საქართველო-ჩინეთის თავისუფალი ვაჭრობის შეთანხმების ფორმა.
- ველი 11 (წონა) ცარიელია. ყველაზე გავრცელებული გამოტოვება.
- ველი 12-ში ინვოისის ნომერი არ წერია — ან წერია პროფორმის ნომერი, ნამდვილი ინვოისი კი სხვაა.
- აღწერა არ ემთხვევა ინვოისს. ინვოისში დეტალური ჩამონათვალია, სერტიფიკატში კი „various goods”.
- HS კოდი სხვაა. სერტიფიკატზე ერთი ექვსნიშნა კოდი წერია, დეკლარაცია კი სხვა კოდით იწერება.
- სერტიფიკატი მხოლოდ ტვირთის ნაწილს ფარავს. კონტეინერში 5 პოზიციაა, სერტიფიკატზე — 3. დანარჩენ ორზე გადასახადი დაერიცხება.
- ინვოისი მესამე ქვეყნის კომპანიამ გასცა, ველი 5 კი ცარიელია.
- ვადაგასულია — გაცემიდან ერთ წელზე მეტი გავიდა.
- ბეჭედი ან ხელმოწერა აკლია (ველი 13 ან 14), ან სკანზე ჩამოჭრილია.
ამ ცხრა პუნქტიდან რვა გასწორებადია — ექსპორტიორს შეუძლია სერტიფიკატი ხელახლა გასცემინოს. კითხვა მხოლოდ დროა: სანამ ახალი ორიგინალი ჩინეთიდან ფოსტით ჩამოვა, ტვირთი დგას და მოცდენის ხარჯი გერიცხება. სწორედ ამიტომ ჯობს შეცდომა სკანზე დაიჭირო, სანამ ტვირთი გზაშია.
ორი რეალური შემთხვევა — ერთი გადარჩა, მეორე არა
✅ შემთხვევა 1 — მოსწრებული გასწორება
ჩინეთიდან ორი კონტეინერი, საბაჟო ღირებულება 178 430 ₾, პოზიცია 12%-იანი. კლიენტს სერტიფიკატი ჰქონდა და დარწმუნებული იყო, რომ ყველაფერი რიგზეა.
დოკუმენტების შემოწმებისას ორი რამ აღმოჩნდა: ველი 11 (ბრუტო წონა) ცარიელი იყო და ველ 12-ში ინვოისის ნომერი საერთოდ არ ეწერა. ასეთი სერტიფიკატი ფორმალურად „ჩინურ საქონელზეა”, მაგრამ საბაჟოსთვის ის ამ კონკრეტულ ტვირთს ვერ უკავშირდება — ანუ შეღავათი ვერ ამოქმედდებოდა.
რა გავაკეთეთ: ტვირთი ჯერ გზაში იყო. იმავე დღეს ექსპორტიორს გავუგზავნეთ ზუსტი ჩამონათვალი — რომელ ველში რა უნდა ჩაეწერა და რომელ ინვოისს უნდა დაკავშირებოდა. ექსპორტიორმა უფლებამოსილ ორგანოს ხელახლა მიმართა და შესწორებული სერტიფიკატი ტვირთის ჩამოსვლამდე მივიღეთ.
შედეგი: ტვირთი 0%-ით გაფორმდა. დაზოგილი იმპორტის გადასახადი — 21 411 ₾ (178 430 ₾ × 12%).
❌ შემთხვევა 2 — დაგვიანებული კითხვა
მეორე იმპორტიორმა სერტიფიკატზე მაშინ იფიქრა, როცა ტვირთი უკვე ჩამოსული იყო. ღირებულება — 64 780 ₾, პოზიცია 12%-იანი.
ექსპორტიორმა ჯერ თქვა „კი, გამოგიგზავნით”. ორი კვირის მიმოწერის შემდეგ გაირკვა, რომ საქონლის ნაწილი სხვა ქარხნისგან ჰქონდა შესყიდული და თავისუფალი ვაჭრობის შეთანხმების ფორმაზე საჭირო დადასტურებას ვერ იღებდა. ტვირთი იდგა, ხარჯები იზრდებოდა — დეკლარაცია ბაზის განაკვეთით გაფორმდა.
სერტიფიკატი მოგვიანებითაც არ მოვიდა.
შედეგი: 7 773 ₾ ზედმეტად გადახდილი იმპორტის გადასახადი (64 780 ₾ × 12%), პლუს დგომის ხარჯი. ეს თანხა აღარ დაბრუნებულა.
განსხვავება ერთადერთია: პირველ შემთხვევაში სერტიფიკატზე საუბარი დაიწყო მაშინ, როცა ტვირთი გზაში იყო. მეორეში — მაშინ, როცა უკვე ჩამოვიდა. თავად დოკუმენტი ორივეგან ერთნაირად რთული იყო ასაღები.
როდის უნდა დაიწყო — ტაიმლაინი
| ეტაპი | რა უნდა გააკეთო |
|---|---|
| შეკვეთამდე | HS კოდით შეამოწმე, შენი პოზიცია 0%-ია თუ 5/12%-იანი. თუ 0%-ია — სერტიფიკატი არ გჭირდება და საკითხი დახურულია. |
| შეკვეთისას | ხელშეკრულებაში ან პროფორმაში ჩაწერე პირობა: „Certificate of Origin, Form for China-Georgia Free Trade Agreement, is required”. სანამ ფასზე ხარ შეთანხმებული — ექსპორტიორი მოქნილია. |
| გადახდამდე | ჰკითხე პირდაპირ: „შეგიძლია ამ ფორმის აღება?” თუ პასუხი ბუნდოვანია — ესეც პასუხია. ზოგიერთი ტრეიდერი უბრალოდ ვერ იღებს მას, რადგან მწარმოებელი სხვაა. |
| გაგზავნამდე | მოითხოვე სკანი და გადაამოწმე ოთხი ველი (8, 9, 11, 12) ინვოისთან. შეცდომა ამ ეტაპზე ჯერ კიდევ მარტივად სწორდება — ტვირთი არსად დგას. |
| გაგზავნისას | ორიგინალი კურიერით გამოატანინე — ტვირთზე ადრე უნდა ჩამოვიდეს. |
| ჩამოსვლამდე | დოკუმენტები გადაეცი ბროკერს, რომ წინასწარი დეკლარაცია შეღავათით გაიწეროს — ეს ერთდროულად ყველაზე დაბალ საბაჟო ტარიფსაც იძლევა. |
როდის არ გჭირდება წარმოშობის სერტიფიკატი
- პოზიცია ისედაც 0%-იანია. ჩინეთიდან შემოსული საქონლის დიდი ნაწილი ამ კატეგორიაშია — მაშინ სერტიფიკატი ვერაფერს შეცვლის.
- ტვირთის საბაჟო ღირებულება 600 აშშ დოლარს არ აღემატება. ასეთ შემთხვევაში სერტიფიკატის წარდგენა შეიძლება არ მოითხოვებოდეს. მაგრამ თუ გამოჩნდება, რომ ერთი ტვირთი განზრახ დაიშალა პატარა ნაწილებად, რათა ამ ზღვრისთვის გვერდი აევლოთ — შეღავათი არ გავრცელდება.
- HS კოდი გამონაკლისების სიაშია. ასეთ პოზიციებზე სერტიფიკატი გადასახადს ვერ ანულებს — ბაზის განაკვეთი რჩება.
ამიტომაც არის პირველი ნაბიჯი ყოველთვის HS კოდი და არა სერტიფიკატი. კოდის დადგენაში და საბაჟო დეკლარაციის მომზადებაში ჩვენ ვეხმარებით — ფასები აქ ნახე.
ხშირად დასმული კითხვები
რამდენ ხანს მოქმედებს ჩინური წარმოშობის სერტიფიკატი?
გაცემიდან ერთი წელი. ტვირთი ამ ვადაში უნდა გაფორმდეს, თორემ დოკუმენტი აღარ გამოდგება.
სერტიფიკატი ტვირთის გაგზავნის შემდეგ გაიცა — გამოდგება?
დიახ, თუ მასზე წერია „ISSUED RETROACTIVELY”. ასეთი სერტიფიკატი შეიძლება გაიცეს ტვირთის გაგზავნიდან არაუგვიანეს ერთი წლისა, როცა ის დროულად არ გაიცა ფორსმაჟორის, შეცდომის ან სხვა საპატიო მიზეზის გამო.
დღგ-საც ანულებს?
არა. 18% დღგ რჩება. სერტიფიკატი მხოლოდ იმპორტის გადასახადს (0/5/12%) ეხება. დღგ-ს გადამხდელი კომპანიისთვის ეს პრობლემა არ არის — დღგ ჩათვლით უკან ბრუნდება. იმპორტის გადასახადი კი აღარ ბრუნდება: სწორედ ის არის რეალური დანაკარგი.
ჩვეულებრივი „Certificate of Origin” გამოდგება?
არა. საჭიროა თავისუფალი ვაჭრობის შეთანხმების ფორმა, რომლის სათაურშიც წერია „Form for China-Georgia Free Trade Agreement”. სხვა ფორმა შეღავათს არ რთავს.
ჰონგ-კონგიდან ჩამოსულ ტვირთს იგივე ფორმა სჭირდება?
არა. ჰონგ-კონგთან საქართველოს ცალკე თავისუფალი ვაჭრობის შეთანხმება აქვს, თავისი ფორმით. ჩინეთის ფორმა ჰონგ-კონგის ტვირთზე არ მუშაობს და პირიქით.
სერტიფიკატი დაიკარგა — რა ვქნა?
უფლებამოსილ ორგანოს შეუძლია გასცეს დამოწმებული ასლი წარწერით „CERTIFIED TRUE COPY of the original Certificate of Origin number ___ dated ___”. ასლი მოქმედებს ორიგინალის ვადის ფარგლებში.
ტვირთი უკვე ჩამოვიდა, სერტიფიკატი კი არ მაქვს — რა ვქნა?
ექსპორტიორს მოსთხოვე სერტიფიკატი უკუძალით („ISSUED RETROACTIVELY”). ეს შესაძლებელია, მაგრამ საბაჟოს ორიგინალი სჭირდება — ის ჩინეთიდან ფოსტით მოდის და ამ დროს ტვირთი დგას, მოცდენის ხარჯი კი გერიცხება. თუ დეკლარაცია უკვე გაფორმდა ბაზის განაკვეთით, გადახდილი თანხის დაბრუნება ცალკე პროცედურაა და ყოველთვის არ გამოდის.
ჩინური ტვირთის განბაჟება
ვაფორმებთ ჩინეთიდან შემოსულ ტვირთებს — საზღვაო, სახმელეთო და საჰაერო. მუშაობა დისტანციურია, სახელმწიფო eCustoms ლიცენზიით: HS კოდის დადგენა, დეკლარაციის მომზადება ASYCUDA-ში და წინასწარი დეკლარირება ტვირთის ჩამოსვლამდე. დეკლარაციაში წარმოშობის სერტიფიკატი შეღავათის კოდთან ერთად ეთითება.
📞 +995 598 154833
💬 WhatsApp
✈️ Telegram
📧 info@ganbajeba.ge
დაკავშირებული მასალა
- განბაჟება და იმპორტის გადასახადები — როგორ ითვლება გადასახადი და დღგ
- განბაჟების კალკულატორი — დათვალე შენი ტვირთის ღირებულება
- eCustoms და ასიკუდა (ASYCUDA) — წინასწარი დეკლარაცია და ყველაზე დაბალი ტარიფი
- საბაჟო დეკლარაცია — ხშირად დასმული კითხვები
- საბაჟო ბროკერი — როგორ მუშაობს დისტანციური განბაჟება
- საბაჟო გამშვები პუნქტები — სად ხდება გაფორმება
- ტვირთის ძებნა მანქანის ნომრით — სად არის შენი ტვირთი ახლა
- იმპორტის წინასწარი შეტყობინება — ტექნიკაზე, სათამაშოებსა და სამშენებლო პროდუქტზე
- ფიტოსანიტარიული კონტროლი და ფორმა 3 — მცენარეული ტვირთისთვის
სტატია მომზადებულია საქართველო-ჩინეთის თავისუფალი ვაჭრობის შეთანხმების ოფიციალური ტექსტისა და პრაქტიკული გამოცდილების საფუძველზე. წყაროებთან მუშაობის წესები აღწერილია ჩვენს სარედაქციო პოლიტიკაში. კონკრეტულ ტვირთზე გადაწყვეტილება მხოლოდ დოკუმენტების ნახვის შემდეგ მიიღება — დაგვიკავშირდი.
ganbajeba.ge · შპს დეკლარო · ს/კ 402342924
გიორგი ცაბაძის ქ. 2, თბილისი, საქართველო
📞 +995 598 154833 · 📧 info@ganbajeba.ge
